ОМӮЗГОР ВА МАҚОМИ ОН ДАР ҶОМЕА

Имруз дар арафаи иди касбии омӯзгор, ки дар саросари кишвари соҳибистиқлоли мо ҷашн гирифта мешавад, як бори дигар ба таъриху тамаддуни ниёгони мардуми тоҷик таваҷҷуҳ мефармоем ва мебинем, ки масъалаи илму маърифат ҳамеша аз масъалаҳои аввали тамаддуни рӯзмарраи мо будааст. Халқи тамаддунофари мо ҳамеша захираи бузурги илмомӯзӣ ва фарҳангдӯстӣ доштааст ва бешак, дар тамаддуни ҷаҳонӣ нақши нобиғагони ин миллат хеле барҷаста аст. Имрӯзҳо, ки халқи тоҷик соҳиби истиқлол шудаасту сарбаландона бо роҳбарии Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ояндаи худро месозад, нақши устодону омӯзгорон боз ҳам баландтар мешавад ва талабот низ аз онҳо дучанд мегардад. “Мо мактабро ба ҳайси боргоҳи илму дониш, саводу маърифат ва омӯзгорро чун шахси мафкурасозу тарбиятгари насли наврас эътироф карда, ба онҳо арҷу эҳтиром гузоштанро аз ҷумлаи масъалаҳои муҳимтарин медонем. Зеро агар мактаб ва омӯзгор набошад, сатҳи маърифатнокии мардум паст мегардад, миллат бесавод мемонад, ҷомеа ба ҷаҳолат гирифтор мешавад ва дар натиҷа оромиву сулҳу субот, амнияту осоиш ва муҳимтар аз ҳама, рушди давлат сахт халалдор мегардад. Бинобар ин, ғамхорӣ кардан ба илму маориф, яъне ҳалли масъалаҳои дар ин самт ҷойдошта – сармоягузорӣ ба хотири рушди неруи инсонӣ мебошад. Маҳз ба ҳамин хотир, мо дар сиёсати иҷтимоии давлату Ҳукумат рушди бонизоми соҳаи маориф, мақому манзалати омӯзгор ва фароҳам овардани шароити мусоиду беҳтарро барои наврасону ҷавонон яке аз самтҳои афзалиятнок дониста, барои рушди ин соҳаи муҳимми низоми иҷтимоӣ ҳамаи чораҳои заруриро роҳандозӣ карда истодаем”. Аз ин рӯ, омӯзгорону устодони имрӯзаи моро зарур аст, ки ҳамеша меҳнат намоянд ва шогирдони худро дар руҳияи меҳнатдӯстӣ ва ҳалолкорӣ тарбия намоянд то ба ин мақоми баланд сазовор бошанд.

ТАНЗИМ БАРАКАТИ ЗИНДАГӢ

Дар ташкилоти ибтидоии ҳизбии Дот (Донишкадаи омӯзгории Тоҷикистон дар шаҳри Панҷакент) мизи мудаввар таҳти унвони "Танзим баракати зиндагӣ" бо иштироки мудири бахши кор бо занони мақомоти иҷроияи ҳокимияти давлатии шаҳри Панҷакент Ҳамзира Замонова, муовини раиси Кумитаи иҷроияи ҲХДТ дар шаҳри Панҷакент Муродзода Мастона ва дигар занони фаъол баргузор гардид. Дар мизи мудаввар оид ба рафти иҷрои муқаррароти Қонун «Дар бораи танзими анъана ва ҷашну маросим дар Ҷумҳурии Тоҷикистон», ки аз ибтикороти наҷибу инсонпарваронаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, Раиси муаззами Ҳизби Халқии Демократии Тоҷикистон муҳтарам Эмомалӣ Раҳмон аст, мавриди баррасӣ қарор гирифт. Иштирокчиёни мизи мудавввр таваҷҷӯҳи худро ба нуктаҳои асосии суханронии Пешвои миллат дар машварат бо фаъолон ва ходимони дини мамлакат карда, иброз намуданд, ки барои иҷрои ҳатмии ин қонуни миллӣ, зери назорати ҷиддӣ қарор додани баргузории маъракаю маросим, ислоҳи камбудиҳои ҷойдошта, пурзӯр намудани корҳои тарғиботӣ дар байни аҳолӣ талош варзанд. Таъкид шуд, ки фармудаи зайли Пешвои миллат, Ҷаноби Олӣ муҳтарам Эмомалӣ Раҳмон дар машварати зикршуда барои аҳли ҷомеа бояд роҳнамо бошад: “Худованд бандаро ҳаст кардааст, ақл додааст, чашм додааст, обу хоку заминро дар ихтиёраш гузоштааст, ки зиндагӣ кун, аз ин дунё баҳра бар, ақлатро кор фармо, ба замона мутобиқ шав, пойбанди хурофот нашав, илм омӯз, касб омӯз, ҳунар омӯз ва зиндагиатро пеш бар”.

Ҳамкории Донишкадаи омӯзгории Тоҷикистон дар шаҳри Панҷакент бо Донишгоҳи давлатии Самарқанд. Дар мулоқот масъалаҳои ҳамкорӣ баррасӣ шуданд. Созишномаи ҳамкорӣ дар бораи таъсиси барномаҳои муштараки таълимӣ дар соҳаҳои филология, таърих, археология, педагогика ва психология ба имзо расид.